Llumnica në një lidhje direkte në emisionin “Info Nata” në Tëvë1, ka thënë se përfshirja e Sindikatës në procesin e rivlerësimit në teste të të punësuarve në KEK, është pengesë.
Ai tha se çdoherë ka pasur nepotizëm në KEK.
“Konkursi nuk është anuluar, por ka shkuar në rivlerësim. Të gjithë kandidatëve që janë rreth 5000 mijë veta do ta kenë të drejtën të rivlerësohen me test me shkrim dhe të intervistohen me gojë. Procesi i rivlerësimit nuk do të varet prej neve, për arsye se ne nuk jemi pjesë përbërëse e komisionit edhe pse kemi kërkuar që të jemi pjesë e komisionit apo vëzhguesit, asnjëherë nuk është pranuar nga KEK-u dhe as tash nuk besoj që do të pranohemi”, ka thënë ai.
Sipas tij, për t’u punësuar në KEK duhet të jesh anëtar i ndonjë partie politike.
“Përfshirja jonë në proces është pengesë për arsye se gjithherë ka pasur nepotizëm siç ka pasur edhe sot. Në vazhdimësi në Kosovë ne kemi pasur, se të gjithë ata që janë punësuar ose është dashur të kenë ndonjë familjar të tyre ose është dashur të jenë anëtarë të ndonjë partie politike për të hyrë në punë dikun, kështu ka ndodhur edhe në KEK. Dhe për këtë arsye ne kemi qenë një lloj pengese për arsye se ne nuk kemi pasur ndonjë parti të krijuar”, deklaroi Llumnica. /teve1.info/
