Skuadra e Llapit nuk po arrin të kthehet te fitorja pasi ka pësuar humbje edhe në xhiron e 12-t të Superligës së Kosovës në futboll.
Të hënën, Llapi pësoi në udhëtim te skuadra e Malishevës që triumfoi me rezultatin 2:1.
Me këtë fitore, Malisheva ngrihet në kuotën e 22 pikëve dhe i prinë tabelës së bashku me Ballkanin, ekip që ka pikë të njëjta.
Në anën tjetër, Llapi mbetet i gjashti në tabelë me 15 pikë pasi regjistroi humbjen e tretë në katër ndeshjet e fundit.
Sulmuesi Valmir Berisha realizoi dy golat për Malishevën, në minutën e 8-të dhe 29-të, ndërsa golin e nderit për Llapin e shënoi Mërgim Cërnaveri në minutën e 68-të.
Fitore të hënën regjistroi edhe Ballkani, i cili mposhti Feronikelin ’74 në udhëtim me rezultatin e thellë 4:1.
Dy gola në pjesën e parë dhe dy të tjerë në të dytën, i dhanë fund dilemës së fituesit në stadiumin “Rexhep Rexhepi” në Drenas.
Bujar Shabani autogol, pastaj Sunday Adetunji, Queven Inacio dhe Bernard Karrica realizuan për Ballkanin, ndërsa golin e vetëm për vendasit e shënoi Suad Sahiti në minutën e 51-të nga penalltia.
Me këtë humbje, Feronikeli ’74 që javën e shkuar brenda 24 orëve u tërhoq dhe rikthye në Superligë, mbetet i fundit në tabelë me 3 pikë të tubuara.
