Pas tre disfatave në katër ndeshjet e fundit, Liverpool rikthehet te fitorja dhe këtë e bën në stadiumin Anfield. Të besuarit e trajnerit Jurgen Klopp nuk e zhgënjyen publikun e pranishëm teksa mposhtën në derbi Evertonin me rezultatin 2-0. Të kuqve iu mjaftoi nga një gol për pjesë teksa ai që zhbllokoi shifrat ishte Mohamed Salah në minutën e 36-të.
Egjiptiani përmbylli një kundërsulm manuali teksa shfrytëzoi një pasim të Nunez duke mos e pasur aspak të vështirë për të mposhtur portierin Pickford. Ndërkohë, në fraksionin e dytë, Liverpool gjeti edhe golin e dytë dhe të sigurisë. Në minutën e 49-të ishte Cody Gakpo që realizoi me portën e boshatisur pas një asisti të Trent-Alexander Arnold.
Për lojtarin e transferuar në merkaton e verës nga PSV, ishte goli i parë me fanellën e Liverpool. Kështu, Liverpool mori një fitore tejet të rëndësishme për situatën ku është në kampionat dhe tashmë të besuarit e trajnerit Jurgen Klopp ngjiten në kuotën e 32 pikëve në vend të nëntë, ndërsa nga ana tjetër, Everton renditet në vend të 18-të me 18 pikë.
