Mit’hat Llozhani u prit me përqafime të ngrohta nga familjarët, pas rikthimit të tij në Kosovë.
Ish-ushtari i UÇK-së për më shumë se dy muaj qëndroi i mbyllur në burgun e Beogradit në Serbi.
E mëngjesin e hershëm të së mërkurës ai u kthye në Kosovë.
Këtë e bëri të ditur avokati i tij, Arianit Koci.
“Fjalën e dhënë e mbaj. Gjithmonë. Sado që ka rrezik e peripeci. Mit’hat Llozhani, i arrestuar në Serbi, sot është liruar dhe posa ka hy në Kosovë. Ka kaluar nëpër një periudhë jo të lehtë. Më shumë informata do t’i japim bashkë me Mit’hatin, ditëve në vijim”, tha avokati Arianit Koci.
Arrestimi i Llozhanit e kishte befasuar edhe ish komandantin e tij.
“Ka qenë një befasi e çuditshme, gjërat po ndodhin këto ka qenë bukur e dhimbshme sepse ekziston një rrezik i madh dhe çdo herë në japim mesazh që mos më u fut (nëpër Serbi) e dimë që armiku nuk ndërron dhe e dimë kush ishim ne për ta. Ne kemi qenë njësi e veçantë speciale në Dukagjin , neve nuk na përket të kalojmë nëpër tokën serbe”, thotw Bujar Ukimeraj, ish-komandant i UÇK-së.
Ukimreaj tregon se Llozhani nuk i kaloi pa vështiërsi dy muajt në burgun e Beogradit.
“Ne më të nuk kemi biseduar, por në bazë të informacioneve të avokatit të tij pasi vetëm familja ka pasur mundësi të vizitojë askush tjetër nuk ka pasur mundësi të vizitojë, përmes familjarëve kemi marrë informacione se fillimi ka qenë bukur i vështirë e shumë herë e kanë kërcënuar dhe ka fundi e kanë trajtuar pak më but”, shprehet ai.
Prandaj ish komandanti i UÇK-së ka një porosi për të gjithë bashkëluftëtarët.
“Na duhet ta kemi parasysh një gjë edhe po ta njeh Serbia kurrë nuk duhet më ra nëpër tokat e tyre se ata janë me shekuj armiq tonë të përbetuar”, tha Ukimeraj.
Se Llozhani nuk u trajtua mirë gjatë kohës sa ishte në paraburgim, e kishte konfirmuar edhe avokati Arianit Koci, që kërkoi reagim institucional e ndërkombëtar.
Tëvë1 ka kontaktuar edhe me familjen Llozhani, mirëpo për shkak se familjari i tyre ka pak kohë që u kthye nga Serbia, nuk kanë qenë të gatshëm të flasin.
