Liga e Parë e Kosovës, do të vazhdojë me xhiron e katërt të saj, e cila do të luhet të shtunën.
Prej orës 16:30, do të nisin të gjitha nëntë ndeshjes e kategorisë së dytë të futbollit kosovar, ku gara për titullin e kampionit dhe rikthim në Superligë është interesante prej fillimit të sezonit.
Edhe në këtë xhiro do të ketë përballje interesante, por dy ndeshje po vlerësohen derbi, të cilat do të luhen në Vushtrri dhe Drenas.
Vushtrria – Dinamo është ndeshja e parë, që pritet të jetë interesante pasi të dyja skuadrat kërkojnë rezultat pozitiv në këtë përballje.
Si Vushtrria ashtu edhe Dinamo nuk dinë për humbje ende, pasi kanë tubuar nga 7 pikë pas tri ndeshjeve të luajtura.
Dueli tjetër, është ai ndërmjet Feronikelit ’74 dhe Suharekës, ekip që ka një fitore dhe dy humbje, të cilat i pësoi në dy ndeshjet e fundit.
Në anën tjetër, Feronikeli ’74 ka dy fitore rresht dhe 6 pikë të mbledhura, ndërsa kërkon edhe fitoren e tretë radhazi.
Ndeshjet tjera të kësaj xhiroje, janë Trepça ’89 – Tefik Çanga, Vjosa – Liria, KEK-u – Rilindja, 2 Korriku – Kika, Istogu – Besa, Prizreni – Vëllaznimi dhe Trepça – Ramiz Sadiku.
