Pas mbrojtësit Albian Hajdari, edhe mesfushori Leon Avdullahu ka vazhduar kontratën me skuadrën e Hoffenheimit.
Ekipi i Bundesligës së Gjermanisë, të mërkurën ka zyrtarizuar vazhdimin e bashkëpunimit me mesfushorin e Kombëtares së Kosovës.
Me rinovimin e kontratës, Avdullahu do të jetë pjesë e Hoffenheimit deri në verën e vitit 2031 pasi kontrata paraprake i skadonte në vitin 2029.
Drejtori sportiv i Hoffenheimit, Andreas Schicker, ka thënë se në klub janë shumë të kënaqur që kanë rinovuar kontratën me Avdullahun, të cilin e ka vlerësuar lartë për vizionin e tij të lojës, që i përshtatet tërësisht skuadrës.
Sipas tij, Avdullahu është dhe mbetet njëri prej lojtarëve kyç të Hoffenheimit për të ardhmen, duke e quajtur figurë kryesore të skuadrës.
Ndërkohë, Avdullahu është shprehur tejet i lumtur që do të vazhdojë të jetë pjesë integrale e Hoffenheimit dhe së dëshiron që të kontribuojë në suksesin e ekipit dhe klubit.
Avdullahu në verën e vitit të shkuar iu bashkua Hoffenheimit për 10 milionë euro nga Baseli, ndërsa këtë sezon në 32 paraqitje në të gjitha garat ka regjistruar 1 asistim.
Gjithashtu, Avdullahu ka edhe 5 paraqitje me Kombëtaren e Kosovës për të cilën debutoi në muajin shtator të vitit të shkuar.
