Lidhja Demokratike e Kosovës ka reaguar pasi emrat e deputetëve të saj që nuk votuan Projektligjin për Dhomat e Specializuara u vendosën nga protestuesit në një listë, krahas emrave të deputetëve të Listës Serbe.
Në reagimin e saj, LDK-ja e ka cilësuar këtë veprim si përpjekje për linçim publik dhe kërcënim politik, duke theksuar se qëndrimi i saj për këtë çështje është parimor.
“Vendosja e emrave të deputetëve të LDK-së në një rresht me deputetët e Listës Serbe, për shkak të qëndrimit tonë parimor, logjik e shtetar, është përpjekje e ulët për linçim publik dhe kërcënim politik.
Mesazhi ynë është i qartë: LDK nuk shantazhohet. As me etiketime, as me kërcënime, as me përpjekje të tilla”, thuhet në reagim.
LDK-ja ka deklaruar se qëndrimi i saj, sipas tyre, buron nga përgjegjësia ndaj Kosovës dhe se çështje të tilla të ndjeshme kërkojnë seriozitet juridik dhe koordinim me aleatët.
“Ne nuk e mashtrojmë popullin me iniciativa që nuk prodhojnë efektin juridik që u premtohet qytetarëve. Nuk ushqejmë shpresa të rreme dhe nuk i përdorim dhimbjen e ndjenjat e njerëzve për përfitime politike”, thuhet më tej në reagim.
Në fund, LDK-ja u ka bërë thirrje partive politike dhe udhëheqësve të tyre që të tregojnë përgjegjësi dhe të ndalin, siç ka thënë, gjuhën e linçimit.
“Dallimet për rrugën që duhet ndjekur nuk na bëjnë armiq. Kosova ka nevojë për maturi dhe bashkëpunim; nxitja e urrejtjes mes nesh vetëm e dobëson atë”, përfundon reagimi i LDK-së.
