Anëtari i kryesisë së LDK-së, Xhafer Tahiri tha se realizimi i buxhetit në gjashtë mujorin e parë të këtij viti është 9 përqind ose më i ulti në dhjetë vitet e fundit.
“Ky mos efikasitet i qeverisë në realizim të projekteve kapitale po përkthehet me rënie ekonomike, mbyllje të bizneseve, humbje të vendeve të punës, rrijte të varfërisë në Kosovë dhe dëmtim zinxhiror në të gjitha fushat e kapluara nga kriza”, tha ai.
Kurse, anëtarja e kryesisë së LDK-së, Jehona Lushaku-Sadriu, tha se Ministria e Financave, për investime kapitale në 6 muajtë e parë të këtij viti ka arritur të realizojë vetëm 1 për qind të buxhetit.
“47 projekte të rëndësishme që kanë të bëjnë me avancimin e sistemeve për menaxhimin e financave publike, kanë zero realizim nga kjo ministri. Ndërkohë, Ministria e Mbrojtjes nuk ka më shumë se 5 përqind realizim për investimet kapitale të dedikuara për 6 muajt e parë. Është kontradiktore se si javën e kaluar kryeministri fliste për luftën, ndërkohë që arrin të investoj vetëm 5 përqind të buxhetit të kësaj ministrie në pajisjet dhe forcimin e ushtrisë së Kosovës. Do të thotë nga 53 milionë euro të dedikuara për investime kapitale për ushtrinë e Kosovës, Ministria e Mbrojtjes ka realizuar vetëm dy milionë nga to”, tha ndër të tjera Lushaku-Sadriu.
Lushaku tha se edhe Ministria e Shëndetësisë ka arritur të realizojë 5 për qind të buxhetit të dedikuar për investime kapitale.
