Hykmete Bajrami, Shkëmb Manaj e Armend Zemaj nga LDK u bënë bashkë për ta dorëzuar një lëndë të re në Gjykatën Kushtetuese.
Zyrtarët e lartë të LDK-së, i kanë kërkuar Gjykatës që të sqarojë të gjitha normat kushtetuese që lidhen me rregulloren e Kuvendit në lidhje me komisionin për votim të fshehtë.
Ata kanë bërë thirrje që sa më shpejtë të trajtohet kjo lëndë nga Gjykata Kushtetuese.
“Lidhja Demokratike e Kosovës beson se aktgjykimi i Gjykatës Kushtetuese, e ka qartësuar se përgjegjësia për konstituimin e Kuvendit i takon Grupit më të madh parlamentar dhe se votimi duhet të jetë në pajtim me Rregulloren e Punës së Kuvendit si dhe të praktikave të mëhershme parlamentare, rrjedhimisht votim i hapur për zgjedhjen e kryetarit të Kuvendit. Prandaj, me qëllim të zhbllokimit të ngërçit politik dhe institucional si dhe formimin e institucioneve të Kosovës” , tha Shkëmb Manaj nga LDK-ja.
Nënkryetarja e Lidhjes Demokratike të Kosovës, Hykmete Bajrami, ka bërë të ditur se do të vazhdojnë të marrin pjesë në seanca edhe pas dërgimit të lëndës së re në Gjykatën Kushtetuese.
“Natyrisht se do të marrin pjesë në seanca sepse ne në secilën seancë po kërkojmë nga kryesuesi që të kthehet në rendin e ditës dhe të na mundësohet e drejta e votimit. Në qoftë se nuk do të na mundësohet kjo ne përsëri do të veprojmë ashtu siç kemi vepruar dje në shenjë proteste”, tha Bajrami.
Ndërkohë edhe presidentja Vjosa Osmani ka theksuar se nëse Kuvendi nuk konstituohet së shpejti, ajo do t’i drejtohet Kushtetueses me pyetjen se cilat do të jenë pasojat.
Edhe partia fituese zgjedhjeve, Lëvizja Vetëvendosje, nuk e ka përjashtuar mundësinë që t’iu drejtohen Gjykatës Kushtetuese.
