Studiuesi i filozofisë politike, Latif Mustafa, ka vlerësuar se shteti i Kosovës u ka qëndruar afër shqiptarëve të Luginës së Preshevës si asnjëherë më parë, në prag të zgjedhjeve në Serbi.
Ai ka theksuar se Presidenca dhe institucionet e tjera të Kosovës janë angazhuar për të sjellë sa më shumë qytetarë në Preshevë dhe rrethinë, me qëllim të pjesëmarrjes në votime.
“Shteti i Kosovës, si kurrë më parë, u ka qëndruar afër shqiptarëve të Luginës në këto zgjedhje. Nga Presidenca dhe të gjitha pushtetet janë angazhuar që të sjellin sa më shumë njerëz në Preshevë për të votuar. Ka lëvizje të mëdha të njerëzve”, ka deklaruar Mustafa në emisionin “Këndi i Debatit” në Tëvë1.
Ai ka thënë se angazhimi dhe mobilizimi janë vërejtur edhe në atmosferën e krijuar në Preshevë.
“Nuk e mbaj mend Preshevën, tash e shumë kohë, kaq të gjallë”, është shprehur ai.
Mustafa ka vlerësuar gjithashtu se vota e shqiptarëve mund të ndikojë në zhvillimet politike në Serbi.
“Shqiptarët kësaj radhe mund ta bëjnë ndryshimin në Serbi me votën e tyre, pasi mund të ndodhë një ndryshim i madh me rrëzimin e Aleksandar Vuçiqit dhe, në këtë mënyrë, të demokratizohet Serbia”, ka theksuar ai.
