Deputeti i grupit multietnik, Fridon Lala, ka komentuar rastin e 4-vjeçares nga Gjakova, e cila vdiq në rrethana ende të pasqaruara, përderisa familja e Melisa Shalës, akuzon mjekët për neglizhencë.
Lala thotë se për të sqaruar vdekjes e saj duhet të presin raportet, të cilat do të tregojnë se si ka vdekur e mitra.
“Hala kemi vakume të ndryshme, duke nisur nga vetë rasti se si ka ndodhur që vajza të lëndohet dhe të shkojë në atë pikë të ta humbë edhe jetën… Deri në javën tjetër po presim një mbledhje të komisioneve të përbashkëta, ku do të ftojmë në raportim edhe kryetarin e Komunës së Gjakovës, doktoreshën e Shëndetësisë në këtë komunë, drejtorin e QKUK-së dhe ministrin e Shëndetësisë, në mënyrë që të kemi më shumë informata”, tha ai në emisionin “Ditari” në Tëvë1.
Ndërsa, duke folur për trajtimin institucional ndaj komuniteteve jo-shumicë, Lala thotë se për herë të parë, nga qeverisa e tanishme ka investime direkte të cilat ndikojnë në përmirësimin e jetës së tyre.
“Mund të them me siguri të plotë se që nga pas lufta në asnjë qeveri nuk ka pasur investime dhe prioterizim më të madh të nevojave të pjesëtarëve të komuniteteve jo-shumicë. Po flas për projekte konkrete të cilat ndikojnë drejtpërdrejtë në përmirësimin e mirëqenies së pjesëtarëve të komunitetit jo-shumicë. Për herë të parë në Kosovë kemi program bursash universitare që i specifikon studentë nga radhët e komuniteti rom, ashkali dhe egjiptian…”, deklaroi ai.
Gjithashtu, deputeti i grupit multietnik tha se qeverisjet e kaluara nuk janë marrë me komunitetet jo-shumicë, derisa sipas tij, qeverisa e tanishme për një kohë të shkurtë ka realizuar projekte që përfshijnë infrastrukturë dhe shtrirje të rrjetit të ujit të pijes.
“Për herë të parë ka projekte specifike që targetojnë infrastrukturën në lagjet e komuniteteve. Për herë të parë, pas 21-viteve është një projekt i cili përfshinë shtrirjen e rrjetit të ujit të pijes në lagjet e komunitetit në Fushë-Kosovë. Për herë të parë, kemi investime milionëshe në projektet e banimit”, shtoi ai./teve1.info/
