Kuvendi i Kosovës ka nisur sot seancën plenare, në të cilën deputetët pritet të shqyrtojnë një sërë çështjesh, përfshirë tri projektligje dhe Raportin Vjetor të Auditimit të Buxhetit të Republikës së Kosovës për vitin 2025.
Sipas njoftimit të Kuvendit, seanca do të nisë me miratimin e procesverbalit nga mbledhja e kaluar, ndërsa në vazhdim janë paraparë deklarimet jashtë rendit të ditës dhe pyetjet parlamentare.
Në rend dite është edhe propozimi i grupeve parlamentare për zëvendësimin dhe emërimin e deputetëve në komisionet parlamentare, si dhe miratimi i fushëveprimit të këtyre komisioneve për Legjislaturën e XI-të.
Një pjesë e rëndësishme e seancës do t’i kushtohet shqyrtimit të parë të tri projektligjeve: atij për Agjencinë e Menaxhimit të Emergjencave, Projektligjit për Regjistrimin e Bujqësisë dhe Projektligjit për Inspektoratin Qendror të Bujqësisë, Sigurisë Ushqimore, Veterinës dhe Pylltarisë.
Deputetët do të shqyrtojnë gjithashtu raportin e Auditorit të Përgjithshëm për Raportin Vjetor të Auditimit të Buxhetit të Republikës së Kosovës për vitin 2025./teve1.info/
