Ndërmjetësi i Bashkimit Evropian për dialogun Kosovë-Serbi, Miroslav Lajçak ka deklaruar se dialogu Kosovë-Serbi gjatë vitit 2024 ka qenë më i ngadalshëm se sa që ka shpresuar.
Megjithatë sipas tij ajo që është arritur vazhdon të jetë para së gjithash në të mirë të qytetarëve si në Kosovë ashtu edhe në Serbi.
Ai ka përmendur edhe krijimin e Komisionit të Përbashkët për Personat e Zhdukur për çka ka thënë se ndihet i inkurajuar nga një hap i tillë përpara.
“Në dialog, përderisa progresi ka qenë më i ngadalshëm nga sa kisha shpresuar, ajo që kemi arritur vazhdon të jetë para së gjithash në të mirë të qytetarëve si në Kosovë ashtu edhe në Serbi. Megjithatë, jam i inkurajuar nga hapat e vegjël përpara, siç është krijimi i Komisionit të Përbashkët për Personat e Zhdukur. Është koha e fundit për t’u afruar me familjet dhe të dashurit e atyre, fati i të cilëve ende nuk dihet”, ka shkruar Lajçak në Facebook.
Lajcak tutje ka folur edhe rreth takimit me kryenegociatorët e Kosovës dhe Serbisë, Besnik Bislimi dhe Petar Petkoviq, të mbajtur në Bruksel, ku ka thënë që është dërguar mesazhi i qartë se nuk do të ketë integrim në BE pa normalizim të marrëdhënieve mes dy vendeve.
“Para festave, unë prita në takim Kryenegociatorët – zëvendëskryeministrin e parë Besnik Bislimi dhe drejtorin Petar Petkoviq. Takimi u zhvillua në mes të një jave të ngarkuar për Ballkanin Perëndimor, duke përfshirë Samitin BE-Ballkani Perëndimor dhe miratimin e Konkluzioneve të Këshillit për Zgjerimin. Si për Kosovën ashtu edhe për Serbinë, ata dërgojnë mesazh të qartë se nuk do të ketë integrim në BE pa normalizimin e marrëdhënieve të tyre dhe ofrojnë plan të detajuar të punës për vitin e ardhshëm, të miratuar nga të gjitha shtetet anëtare të BE-së”, ka shkruar Lajçak në Facebook.
Në fund ai ka përsëritur pritshmëritë e BE-së për zbatimin e Marrëveshjes së Ohrit të vitit të kaluar.
“De-përshkallëzimi i tensioneve, përgjegjësi për sulmet e 2023, riintegrimi i serbëve të Kosovës, themelimi i Asociacionit të Komunave me Shumicë Serbe si dhe njohja e dokumenteve dhe simboleve të Kosovës”./teve1.info/
