E ardhmja e stolit të Kombëtares së Italisë vazhdon të jetë e paqartë, ndërsa sot “La Gazzetta dello Sport” ka hedhur një emër befasues në skenë.
Pep Guardiola mund të emërohet përzgjedhës i Italisë.
Sipas të përditshmes italiane, trajneri spanjoll është një nga opsionet që po shqyrtohet për të udhëhequr “Azzurrët”, megjithëse Antonio Conte dhe Roberto Mancini mbeten kandidatët më seriozë për këtë post.
Conte vazhdon të konsiderohet favorit nga shumë drejtues të futbollit italian, ndërsa Mancini gëzon mbështetje të fortë falë suksesit të tij me Italinë në Euro 2020.
Megjithatë, emri i Guardiolës shihet si alternativa më ambicioze dhe revolucionare, edhe pse realizimi i një marrëveshjeje me teknikun spanjoll do të ishte shumë i vështirë, kryesisht për shkak të kostos së lartë financiare.
