Presidentja e Kosovës, Vjosa Osmani, ka nënshkruar sot dekretin për shpërndarjen e Kuvendit të Kosovës, pas dështimit të deputetëve për të zgjedhur presidentin e ri të vendit.
Vendimi u bë i ditur mëngjesin e së premtes gjatë një konference për media, ku Osmani njoftoi se ka dekretuar shpërndarjen e legjislaturës së dhjetë të Kuvendit.
Ajo theksoi se vendi po shkon drejt zgjedhjeve të reja pas vendimit të përfaqësuesve të popullit në seancën e mbrëmshme.
“Jam këtu para jush sepse përfaqësuesit e popullit mbrëmë vendosën që ta dërgojnë vendin në zgjedhje të reja. Kjo situatë ka qenë plotësisht e evitueshme. Është fatkeqësi e madhe për këtë shtet që ata nuk zgjodhën interesin e Republikës së Kosovës. Andaj sot, në përputhje me Kushtetutën e Kosovës, kam nxjerrë dekretin për shpërndarje të Kuvendit dhe nëpërmjet këtij dekreti po kryej detyrimin kushtetues i cili është i përcaktuar qartë”, deklaroi Osmani.
Me këtë vendim, vendi pritet të hyjë në procesin e zgjedhjeve të reja parlamentare.
