Gjatë së martës u shënua një progres i rëndësishëm me zgjedhjen e kryeparlamentarit dhe katër nënkryetarëve të tjerë, por Kuvendi i Kosovës ende nuk është konstituuar.
Procesi u bllokua tek votimi për nënkryetarin serb nga Lista Serbe, Slavko Simiq, i cili në tri tentime i nuk siguroi votat e mjaftueshme për këtë pozitë.
Po ashtu, partitë opozitare kundërshtuan edhe kandidaturën e ministrit në detyrë, Nenad Rashiq.
Disa deputetë e kundërshtuan votimin e Rashiqit me arsyen se është në kundërshtim me Kushtetutën e vendit.
Por politikani serb thotë se veprimet e tij janë në përputhje me rregullat parlamentare.
“Disa nga deputetët më thanë që votimi i tillë është kundërkushtetues. Unë thashë se kjo nuk është kundërkushtetuese. Dje pasdite shkova të takoj disa njerëz që merren me çështje kushtetuese dhe më thanë që nuk ka asnjë shkelje nëse votohet një përfaqësues si unë për nënkryetar të Kuvendit”, ka thënë Rashiq
Rashiq paralajmëroi se do të kandidojë përsëri për postin e nënkryetarit, në përputhje me rregullat parlamentare.
Por se, shpreson që kësaj radhe do të ketë mbështetjen e opozitës.
“Unë me të vërtetë po besoj në gatishmërinë e opozitës dhe të partive politike. Por ju kujtoj që për një kohë të gjatë jam në politikë dhe kam punuar me PDK-në, por edhe me AAK-në, LDK-në e Nismën. E konsideroj që ndoshta ka qenë një befasi,”, është shprehur Rashiq
Edhe profesori, Mazllum Baraliu, thotë mes tjerash se nuk përbën shkelje të Kushtetutës nëse Nenad Rashiq zgjidhet nënkryetar i Kuvendit.
“Neni 67-të flet për zgjedhjen e kryetarëve dhe nënkryetarëve dhe njëkohësisht ky nen nuk thotë që të shkohet në pako. Është çështje tjetër nëse krijohet një praktikë sepse ka ndodhur në të kaluarën të shkohet në pako por se Kushtetuta nuk e obligon”, ka thënë Baraliu.
Kuvendi konsiderohet i konstituuar vetëm pasi të zgjidhen të pesë nënkryetarët dhe më pas nis rrjedhja e afatit ligjor për formim të Qeverisë.
Seanca për finalizim të konstituimit do të vazhdojë të enjten në orën 11:00.
