Gjykata Kushtetuese e Kosovës sot ka publikuar aktgjykimin e plotë lidhur me konstituimin e Kuvendit.
Mes tjerash, Kushtetuesja ka konstatuar se seanca konstituive e Kuvendit, e filluar me 15 prill 2025 nuk ka përfunduar si rezultat i moszgjedhjes së nënkryetarit të Kuvendit nga radhët e deputetëve të komunitetit serb.
“Gjykata në përbërje të plotë, pas këshillimit, njëzëri, vendosi: (i) të konstatojë, që Seanca Konstituive e Kuvendit, e filluar me 15 prill 2025 nuk ka përfunduar si rezultat i moszgjedhjes së nënkryetarit të Kuvendit nga radhët e deputetëve të komunitetit Serb, dhe Kuvendi nuk është konstituuar në pajtim me përcaktimet e paragrafit 1 të nenit 66 [Zgjedhja dhe Mandati] dhe paragrafët 1 dhe 4 të nenit 67 [Zgjedhja e Kryetarit dhe Nënkryetarëve] të Kushtetutës së Republikës së Kosovës; (ii) të urdhërojë, që Seanca Konstituive e Kuvendit të përfundojë brenda afatit të përcaktuar me paragrafin 1 të nenit 66” , thuhet në aktgjykim.
Gjithashtu, në aktgjykimin e Gjykatës Kushtetuese thuhet qartë se deputetët nuk e kanë për obligim votimin në pako të nënkryetarëve.
“Gjykata rikujton se nga dispozitat kushtetuese, të Rregullores së Kuvendit dhe praktika gjyqësore e Gjykatës nuk rezulton ndonjë obligim i deputetëve për votimin në pako të nënkryetarëve të Kuvendit, qofshin ata që propozohen nga 3 (tre) grupet më të mëdha parlamentare apo komunitetet që nuk janë shumicë. Në këtë kontekst, duke qenë se votimi në pako nuk është shprehimisht i përcaktuar në Kushtetutë, i njëjti mund të realizohet nëse ka dakordim në mes të grupeve parlamentare apo deputetëve” , ka bërë të ditur Kushtetuesja.
Lista Serbe insistonte se mosvotimi në pako i nënkryetarëve përbënte shkelje ligjore, por Gjykata Kushtetuese ka konstatuar se Emilja Rexhepi është zgjedhur në mënyrë të duhur nënkryetare e Kuvendit nga radhët e komuniteteve joshumicë joserbe.
Aktgjykimi i publikuar të mërkurën i obligon deputetët që të zgjedhin një nënkryetar nga komuniteti serb brenda 12 ditësh.
