Brenda Kuvendit jo më larg se në muajin mars do të votohet për Presidentin e vendit.
Pavarësisht që ka kohë mbi dy muaj, emri i vetëm i përfolur është ai i Presidentes aktuale, Vjosa Osmanit.
Megjithatë, ajo duket se nuk do ta ketë të lehtë sigurimin e 81 votave.
Këtë çështje, politologu Melazim Koci, thotë se e di mirë edhe kryeministri në detyrë, Albin Kurti..
“Zotëri Kurti e ka shpjeguar shumë mirë këtë çështje, në dy deklaratat e fundit ka thënë se mund të ketë zgjedhje të jashtëzakonshme, disa e kanë interpretuar si shantazh ndaj opozitës për ti dhënë votat, por unë nuk mendoj që është shantazh, është ndërgjegjësim i tij që ka probleme në sigurimin e 80 votave. Ai nuk ka arritur të konstituoj Kuvendin dhe Parlamentin në mungesë të katër/pesë votave, pse është më lehtë tani të sigurohen 14 vota dhe unë mendoj që ai është i vetëdijshëm për këtë problem. E dyta, ai ka pohu se nuk dëshiron koalicion me askënd sepse ka numra të mjaftueshëm për qeverisje dhe besoj që dëshiron që zonja Osmani të jetë presidente por thjeshtë nuk i ka edhe 14 numra, nëse ata numra zonja Osmani mund ti siguroj atëherë do të jetë presidentja e re, nëse jo duhet gjetur kandidat tjetër, kandidat të pavarur dhe unë mendoj që zgjidhja më e mirë do të ishte nëse partitë politike që tani fillojnë të zhurmojnë një kandidat i cili nuk do të dalë as nga Vetëvendosje e as nga partitë e tjera” , shprehet Koci.
Se brenda sallës nuk mjaftojnë deputetët e Lëvizjes Vetëvendosje dhe të partive të pakicës e thotë edhe hulumtuesi nga Instituti Demokratik i Kosovës, Vullnet Bugaqku.
Ai thotë se prezent duhet të jetë 80 deputetë për dy raundet e para.
“Proceduralisht, një kandidaturë për tu nominuar për president, duhet ti siguroj të paktën 30 nënshkrime të deputetëve të Kuvendit të Kosovës paraprakisht, që i bie që nesh Kuvendi ka 120 deputetë të paktën katër kandidatë kanë mundësi që ti sigurojnë nga 30 nënshkrime. Mirëpo procedura e zgjedhjes së presidentit nuk mund të zhvillohet pa kundër-kandidat. Ka thënë edhe Gjykata Kushtetuese në rastin Pacolli se në gjitha fazat, në raundin e parë, të dytë dhe të tretë duhet të votohen dy kundër-kandidat për president që të përmbushet norma kushtetuese dhe rrjedhimisht procesi zhvillohet në tre raunde, në dy raundet e para duhet domosdo të ketë prezencë të 80 deputetëve në sallë dhe të votojnë këta 80 deputetë për njërin nga kandidatët, pra duhet të jenë 80 vota në kuti të votimit. Në qoftë se asnjëri nga kandidatët në dy raundet nuk i siguron këto vota për tu zgjedhur president atëherë kushtetuta thotë se zhvillohet raundi i tretë i votimit dhe këtë herë mjaftojnë 61 vota në kuti për një kandidat që të zgjidhet president”, thotë ai.
Bugaqku tregon edhe disa nga afatet kohore për këtë procedurë.
Në aktvendimin e vitit 2016, Gjykata Kushtetuese në rastin KO47/16 për zgjedhjen e Hashim Thacit si President i Kosovës, kishte treguar se 120 deputetët nuk e kanë obligim të qëndrojnë në sallë kur votohet Presidenti i Republikës së Kosovës.
Kësisoj, të zgjedhurit e popullit kanë të drejtë të mos qëndrojnë në Kuvend kur të ketë propozime që nuk i përkrahin.
