Dilema e vetme në Superligën e futbollit, ka mbetur të sqarohet se cila nga skuadrat do të luaj në barazh dhe e diela mund ta sqaroj këtë, kur pritet të zhvillohet java e parafundit.
Me Dritën kampione dhe Ballkanin e Malishevën në garat evropiane, Dukagjinin si fitues të Kupës që zuri vendin e fundit për Evropë dhe Ferizajn e Prishtinën e Re, që ranë nga liga, pesë skuadrat e tjera janë në ethe se cila do t’i ikë vendit të tetë, pozitës së barazhit.
Nga vendi i katërt ku është Prishtina me 46 pikë e deri te Llapi i teti me 43 pikë, janë vetëm tri pikë dallim ndërmjet këtyre dy skuadrave, derisa duelet janë goxha të vështira për këto skuadra.
Llapi më i rrezikuar për këtë pozitë, është nikoqir i Malishevës, në stadiumin “Zahir Pajaziti”. Për llapjanët vlen vetëm fitorja dhe më pas rezultatet e ndeshjeve të tjera.
Drenica e shtat që ka 44 pikë është nikoqire e Ferizajt dhe duke e llogaritur skuadrën mysafire që nuk ka për çka të luaj më në Superligë, kjo skuadër llogaritet favorite, në ndeshjen që do të luhet në Skenderaj.
Gjilani i pozitës së gjashtë me 45 pikë, luan kundër rivalit të qytetit në derbin e madh të Anamoravës ndaj Dritës. Megjithëse “Intelektualët” e kanë fituar titullin e kampionit, përballjet ndërmjet veti nuk kanë pasur asnjëherë rëndësi pozitat, pasi rivaliteti i madh ka qenë gjithnjë në rend të parë.
Dukagjini si fitues i Kupës, është mysafir i Prishtinës së Re, skuadrës që poashtu ka rënë nga liga, ndërsa padyshim derbi i javës është ai ndërmjet Ballkanit e Prishtinës në Suharekë, me peshë të madhe për bardhekaltrit, që mund të mbesin në barazh poashtu.
Të gjitha duelet e xhiros së 35-të në Superligë luhen të dielën dhe nisin nga ora 16:00.
