Përkujdesen për ruajtjen e vijës kufitare.
Janë këta Policët e Departamentit të Kufirit në kuadër të Policisë së Kosovës.
Mirëpo, këto kompetenca pritet që së shpejti të kalojnë në një forcë tjetër.
Bëhet fjalë për Xhandarmërinë e Kosovës.
E themelimi i kësaj të fundit, u nënshkrua të martën nga Ministri i Punëve të Brendshme, Xhelal Sveçla.
Ky i fundit njoftoi se ka dhënë firmën për themelimin e grupit punues që do të bëjë analizimin dhe propozimin e modaliteteve të ndryshme.
Por, kush do të bëhet pjesë e kësaj force të re të sigurisë në Kosovë?
”Është Njësia Speciale e Policisë, faktikisht ajo njësi duhet të futet në kuadër të Xhandarmërisë, dmth vetëm i ndërrohet emri. Kurse, Xhandaërmëria si Xhandarmëri kompletohet me strukturat tjera të cilat janë njësitet për sigurimin e kufirit, njësitë për intervenime në raste të trazirave të dhunshme dhe akte terroriste në vend ato veç i kryn Njësia Speciale e cila ekziston, duhet shtuar njësitë për Inteligjencë dhe logjistikë”, ka thënë Hoxha.
Ish-pjesëtari i Policisë Kufitare, Hafir Hoxha, thotë se për shkak të natyrës së punës, Xhandarmëria nuk duhet të jetë nën kompetencën e Ministrisë së Punëve të Brendshme.
“Uniforma, vendi dhe tereni ku vepron, pajisjet të cilat i ka i përngjajnë ngjyrave ushtarake, prandaj edhe detyrat janë më specifike, më të ndijshme dhe duhet të jenë në kuadër të Ministrisë së Mbrojtjes e jo në kuadër të Ministrisë së Punëve të Brendshme. Dmth nuk ka nevojë të ngritet zhurmë e madhe në media, kjo punë mundet me u kry shumë lehtë, me faktin që të mos keqpërdoret tash kjo iniciativë gjatë fushatës për çështje politike sepse është nivel i ulët që të mendohet ashtu”, ka thënë tutje Hoxha.
Këtë nismë po e sheh si të mirëseardhur edhe ish-eprori në Policinë e Kosovës, Refki Morina.
“Mendoj se kjo formë e tillë e organizimit ku do ta ketë ligjin e vet, do ta ketë çështjet financiare të vetat, do ta ketë organizimin e vet, udhëheqjen e vetë, etj., do të jetë e mirëseardhur për arsye se në një mënyrë apo tjetër do të jetë ndihmesë e Policisë së Kosovës dhe Ushtrisë së Kosovës, pa u përzi në kompetencat e tyre, por një bashkëveprim i tyre në aspektin më profesional, edhe teknik, edhe teknologjik”, i shpreh Morina.
Ndryshe, krijimi i saj është përmendur të hënën edhe nga kryeministri në detyrë, Albin Kurti.
