Shefja e Grupit Parlamentar të Lëvizjes Vetëvendosje, Mimoza Kusari – Lila, ka thënë se Kosova asnjëherë nuk ka devijuar nga orientimi paqësor dhe rreshtimi në vlerat demokratike.
Sipas saj, reagimet e miqve dhe partnerëve ndërkombëtar për çështjen e dinarit nuk ka të bëjë me orientimin e shtetit, por vetëm me shqetësimin për mirëqenien e komunitetit serb në Kosovë.
Por, siç, tha ajo në Kosovë mbi 20 mijë qytetarë të komunitetit serb marrin pensionet në valutën euro dhe se nuk është ndaluar qarkullimi i dinarit, por thjesht ajo do të përdoret njësojë sikur valutat të tjera të huaja në Kosovë.
“Reagimet e miqve dhe partnerëve nuk kanë të bëjnë me parimin e vendimeve të marra apo moskushtetushmërinë e tyre, por me shqetësimin për njëanshmërinë e vendimmarrjes dhe mirëqenien e komunitetit serb në Kosovë. Këto shqetësime nuk kanë të bëjnë me orientimin e shtetit tonë. Kosova nuk ka devijuar në asnjë moment nga orientimi paqësor dhe rreshtimi me vlerat demokratike. Ajo asnjëherë nuk ka mbështetur vendet agresore si Rusia, nuk ka rrezikuar demokracinë apo proceset zgjedhore të brendshme dhe liria e veprimit të shprehjes në Kosovë është e nivelit evropian”, tha ajo.
