Kryeministri i Kosovës, Albin Kurti, të dielën ka takuar zëvendëskryeministrin e Sllovenisë, njëkohësisht ministrin e Punës, Familjes, Çështjeve Sociale dhe Mundësive të Barabarta të Sllovenisë, Luka Mesec.
Sipas komunikatës gjatë takimit kanë diskutuar për marrëdhëniet bilaterale Kosovë-Slloveni, si dhe për mundësitë e thellimit të mëtejmë të bashkëpunimit.
Gjithashtu thuhet se kanë bashkëbiseduar edhe për situatën gjeopolitike në botë me theks në ndikimet e mundshme në rajonin e Ballkanit perëndimor.
“Kryeministri Kurti shprehu mirënjohjen e tij për mbështetjen e vazhdueshme të Sllovenisë ndaj Kosovës, si në rrafshin evropian e ndërkombëtar ashtu edhe në fushën e sigurisë, ku trupat sllovene në Kosovë shërbejnë në kuadër të misionit të NATO-s, KFOR”, thuhet në komunikatë.
Të mërkurën, me rastin e vizitës së zëvendëskryeministrit slloven Mesec në Kosovë ku është mirëpritur nga ministri i Financave, Punës dhe Trasfereve, Hekuran Murati, është iniciuar marrëveshja për sigurime shoqërore me Slloveninë.
“Kjo marrëveshje do të lehtësojë barrën e qytetarëve të Republikës së Kosovës që jetojnë në Slloveni, si dhe anasjelltas, duke u mundësuar atyre të realizojnë të drejtën për pension në vendin ku jetojnë”, theksohet në komunikatë./teve1.info/
