Kryeministri i Kosovës, Albin Kurti, tha se për mbajtjen e zgjedhjeve serbe në Kosovë nga ana e Serbisë, kjo e fundit duhet të bëjë kërkesë si palë e interesuar, raporton teve1.info
Këto deklarime Kurti i bëri gjatë takimin me shefin e Misionit të OSBE-së në Kosovë, Michael Davenport.
Sipas komunikatës së Qeverisë, kjo dhe tema tjera u diskutuan në mes të Kurtit dhe shefit të OSBE-së në Kosovë, gjatë një takimi pune.
“U diskutua edhe rreth temave tjera aktuale. Sa i përket kërkesës së Serbisë për mbajtje të zgjedhjeve në territorin e Republikës së Kosovës, Kryeministri Kurti theksoi se siç ka njoftuar shefin e OSBE-së në përgjigjen e 17 nëntorit, për këtë është e nevojshme një marrëveshje ndër-shtetërore dhe se kërkesa për një marrëveshje të tillë duhet të vijë nga Serbia si palë e interesuar”, thuhet në komunikatë.
Sipas komunikatës, kryeministri theksoi përkushtimin e shtuar të Qeverisë ndaj komuniteteve jo shumicë dhe rritjen e mbështetjes për Ministrinë për Komunitete dhe Kthim (MKK), si dhe angazhimin konstant me Zyrën për Çështje të Komuniteteve në Zyrën e Kryeministrit dhe Zyrën e Komisionerit për Gjuhë.
