Kryeministri në detyrë, Albin Kurti, ka refuzuar të komentojë qëndrimin e gjashtë deputetëve të Lidhjes Demokratike të Kosovës (LDK), të cilët kanë deklaruar se nuk do ta votojnë Bekim Sejdiun për president të Kosovës.
Kurti është shprehur se çështja e zgjedhjes së presidentit tashmë është konkretizuar përmes emrit të kandidatit të propozuar nga LDK-ja.
“Vullnetin për zgjedhjen e presidentit e kemi shndërruar në marrëveshje me LDK-në me emrin e përveçëm të profesor Bekim Sejdiut. Mbrëmë kemi pasur takim në VV me kryesinë, tash po shkoj në mbledhjen e Grupit Parlamentar e më pas do të mund të ju drejtohem”, ka deklaruar Kurti.
Ndryshe, më herët, kryetari i Lidhjes Demokratike të Kosovës, Lumir Abdixhiku, ka njoftuar se në mbledhjen e Grupit Parlamentar të partisë gjashtë deputetë kanë thënë se nuk do ta votojnë për president kandidatin e propozuar Bekim Sejdiu.
Ai ka bërë të ditur se kundër kandidaturës së Bekim Sejdiut janë deklaruar Hykmete Bajrami, Avdullah Hoti, Arben Gashi, Armend Zemaj, Kujtim Shala dhe Janina Ymeri./teve1.info/
