Kryeministri i Kosovës, Albin Kurti, ka thënë se Kosova ka nevojë për ndihmën e ShBA-së, Mbretërisë së Bashkuar dhe BE-në, por që sipas tij, kjo ndihmë nuk duhet të jetë në drejtim të qetësimit të autokratëve.
“Ne kemi nevojë për ndihmën e ShBA-së, Mbretërisë së Bashkuar dhe BE-së. Por kjo ndihmë nuk duhet të jetë në drejtim të qetësimit të autokratëve”, tha Kurti për “The Times”.
Sipas “The Times”, perëndimi shpreson që duke i bërë lëshime pakicës serbe, Kosova do ta ruajë paqen aq gjatë sa Vuçiq, ose një pasardhës, përfundimisht do t’i dorëzohet realitetit de fakto, pasi ky do të jetë një parakusht për anëtarësimin në BE.
Kurti ka theksuar se ishte një grup i ngjashëm i komunave serbe që u bashkuan për t’u shkëputur nga Bosnja, i mbështetur nga Millosheviqi, duke shkaktuar luftën atje.
“Nuk do të lejoj që Kosova të bëhet Bosnjë”, tha ai.
Ai tha për The Times se do të mbante zgjedhje të reja, për sa kohë që serbët premtojnë se nuk do t’i bojkotojnë ato. Ai tha se pranoi se kryetarët e komunave ishin vetëm “gjysmë legjitimë”.
“Ne jemi të përkushtuar ndaj demokracisë”, tha ai.
Kurti ka thënë se Kosova është shteti më demokratik në Ballkanin Perëndimor, si dhe një vend serioz.
