Kryeministri në detyrë njëherit kryetari i Lëvizjes Vetëvendosje, Albin Kurti, pas takimeve me kreun e PDK-së, Bedri Hamza dhe atë të LDK, Lumir Abdixhiku ka thënë se mbetet optimist për një arritjen e marrëveshjes për formimin e institucioneve.
Kurti ka thënë se pas takimeve të para të cilat i ka vlerësuar konstruktive, është herët për rezultate, por se ka shpresë për avancim.
Në një postim në “Facebook”, ai ka shkruar se janë të interesuar që vullnetin e qytetarëve të shprehur në zgjedhjet e 7 qershorit ta kthejnë në formim të institucioneve.
“Në kuadër të konsultimeve për formimin e institucioneve të reja, pas zgjedhjeve të parakohshme parlamentare për legjislaturën e njëmbëdhjetë, sot në Kuvendin e Republikës së Kosovës zhvillova takime të ndara me krerët e PDK-së dhe të LDK-së. Është ende herët të flasim për rezultate konkrete, por mbetemi optimist për rrugën përpara. Fryma konstruktive përgjatë bisedimeve njëmend nuk paraqet marrëveshje e garanci për sukses, por meqenëse jemi veçse te takimi i parë pas certifikimit të rezultatit kemi shpresë për avancim në vijim. Jemi të angazhuar dhe të përkushtuar që vullnetin e shprehur të popullit ta jetësojmë me institucione të reja e funksionale, që punojnë për të mirën e qytetarëve dhe Republikës”, shkroi Albin Kurti.
