Kryeministri i Kosovës, Albin Kurti, ka marrë pjesë në pritjen e organizuar nga Ambasada e Shqipërisë në Kosovë në prag të festimit të 28 Nëntorit, Ditës së Pavarësisë së Shqipërisë.
Sipas komunikatës së Zyrës së Kryeministrit, në adresimin e tij, ai ka thënë se nuk janë të rralla rastet kur mblidhen për këtë datë e megjithatë sipas tij kanë gjithmonë të njëjtin emocion.
“Nuk janë të rralla rastet që mblidhemi në këtë datë, këtu në ngjarjen e Ambasadës së Republikës së Shqipërisë në Prishtinë, për të përkujtuar ngjarjen tonë më të madhe, atë të themelimit të subjektivitetit të kombit shqiptar. E megjithatë, ky tubim ka gjithnjë të njëjtin emocion”, ka thënë Kurti.
Po ashtu thuhet se kryeministri Kurti ka përmendur dy momente të veçanta për reflektim e përshtypje.
“Së pari, besoj se e kemi shumë të lehtë sot të jemi bashkë. Është kaq e lehtë, sa na duket e natyrshme si dukuri. Na duket sikur të qenit bashkë në ditët tona më të çmuara ka qenë e lehtë në të gjithë kohët që kemi lënë pas. Por ky tubim, para më pak se tri dekadash nuk mund të imagjinohej, dhe kjo për tri herë më shumë dekada gjithsej. Edhe thjesht imagjinimi shkonte bashkë me rrezikun dhe vuajtjet. Ishte koha e sakrificave dhe dhimbjeve të mëdha për shqiptarët në të dy anët e kufirit. Së dyti, sot, të kapur në përditësinë tonë dhe në tollovinë e ngjarjeve që na mbërrijnë nga çdo cep i globit, një kompleksitet i paparë ndonjëherë në historinë e re botërore, kam përshtypjen se nuk e vlerësojmë aq sa duhet edhe një fakt tjetër. Akti i pavarësisë që u nënshkrua nga patriotët në 28 Nëntorin e motit 1912, një vit më vonë doli se nuk ishte thjesht akt, por program që do të shtrihej në një shekull e më shumë. U nënshkrua pra një program që, për me u përfytyru dhe për me u realizu, kërkonte ndihmën e një projekti tjetër, atë të Sami Frashërit në Shqipëria ç’ka qenë, ç’është e ç’do të bëhet. Që e paraprinte dhe vijon ta pasojë me dimensionin aktual të tij”, është shprehur ai.
Ndërsa, sipas komunikatës në përfundim të fjalës së tij, kryeministri ka ftuar të gjithë që ta festojnë e ta përkujtojnë këtë datë me idenë se Ismail bej Vlora dhe patriotët i shohin nga e ardhmja dhe presin realizimin sa më mirë e sa më të mbarë të udhës që e kanë përcaktuar me ngritjen e flamurit në Vlorë.
“Rilindasit tanë, janë në të kaluarën tonë dhe na shikojnë nga e ardhmja jonë. Në të kaluarën e tyre e kishim Skënderbeun, e në të ardhmen Adem Jasharin. Dhe pikërisht, qenia e jonë e përbashkët, në të tashmen, i bën ata të jenë e kaluara e jonë e përbashkët, dhe njëkohësisht e ardhmja që na pret të bashkuar”, ka përfunduar Kurti.
Gjithashtu theksohet se urimin për Ditën e Pavarësisë së Shqipërisë, kryeministri Kurti e ka shoqëruar edhe me urimin për përvjetorin e 15-të të Shqipërisë në NATO, dhe hapjen e negociatave në rrugën e pandalshme drejt Bashkimit Evropian./teve1.info/
