Kryeministri në detyrë i Kosovës, Albin Kurti, takoi sot ministrin e Punëve të Jashtme të Gjermanisë, Johann Ëadephul.
Duke i uruar mirëseardhje në Kosovë dhe shprehur mirënjohjen për mbështetjen e Gjermanisë ndaj Kosovës, kryeministri tha se “Gjermania ka qenë partnere e palëkundur e Kosovës edhe para pavarësisë sonë dhe bashkëpunimi ynë është i rrënjosur në vlera të përbashkëta dhe në një vizion të përbashkët për një Evropë të qëndrueshme, demokratike dhe të sigurt”.
Kurti u shpreh se Kosova është e vendosur dhe e përkushtuar të punojë bashkë me Gjermaninë për të thelluar raportet bilaterale dhe për të avancuar në rrugën e saj drejt Bashkimit Evropian dhe NATO-s.
Me këtë rast, ai theksoi se Republika e Kosovës meriton që të marrë statusin e vendit kandidat për anëtarësim në Bashkimin Evropian dhe që Komisioni Evropian duhet ta dorëzojë sa më parë pyetësorin për anëtarësim.
Tutje, kryeministri nënvizoi faktin se edhe më shumë se dy vjet pas sulmit terrorist në Banjskë, ku mbeti i vrarë një rreshteri Afrim Bunjaku, udhëheqësi i këtij grupi terrorist dhe paramilitar, Millan Radoiçiq, vazhdon të endet i lirë në Serbi dhe se Beogradi zyrtar refuzon t’ia dorëzojë atë dhe grupin e tij Republikës së Kosovës.
Madje ai u shpreh se Radoiçiq dhe grupi i tij vazhdojnë të paraqesin rrezik për sigurinë e vendit.
Në fund, Kurti e falënderoi ministrin Ëadephul për vizitën e tij, për mbështetjen e vazhdueshme të Gjermanisë dhe për kontributin e Gjermanisë në ruajtjen e paqes dhe sigurisë përmes trupave të saj në misionin e NATO-s në Kosovë, KFOR./teve1.info/
