Në Teatrin “Muharrem Qena” në Mitrovicë u shënua Dita Ndërkombëtare e Personave me Aftësi të Kufizuara me shfaqjen teatrale “Kulturë pa barriera”, një aktivitet që mblodhi artistë shqiptarë, serbë dhe boshnjakë në skenë, duke promovuar përfshirjen dhe bashkëjetesën përmes artit.
Sipas njoftimit, para fillimit të shfaqjes, kryeministri në detyrë i Republikës së Kosovës, Albin Kurti, mbajti një fjalë rasti ku theksoi se kjo shfaqje, e realizuar nga persona me aftësi të kufizuara dhe artistë të komuniteteve të ndryshme, është një shembull i fuqishëm i bashkimit përmes vlerave dhe kulturës.
‘Kulturë pa barriera’ është një shembull i gjallë i asaj çka mund të arrijmë si vend kur nuk i ndajmë njerëzit në kategori, por i bashkojmë me vlera”, u shpreh Kurti.
Ai theksoi se gjatë pothuajse pesë viteve të qeverisjes, kabineti qeveritar është përpjekur që drejtësia sociale, barazia dhe përfshirja të shndërrohen në politika konkrete, duke vënë në prioritet mbështetjen financiare dhe përmirësimin e perceptimit publik ndaj personave me aftësi të kufizuara.
Sipas tij, personat me aftësi të kufizuara nuk duhet të konsiderohen si përfitues pasivë, por si kontribuues aktivë në jetën sociale, kulturore dhe ekonomike të vendit.
Në fjalën e tij, kryeministri përmendi një sërë iniciativash të ndërmarra gjatë mandatit qeverisës, përfshirë: mbështetjen shtetërore për Komitetin Paralimpik dhe Olimpiadën Speciale, krijimin e mundësive për aktivitet sportiv vendor e ndërkombëtar, ofrimin e trajnimeve dhe mbështetjes në punësim për 239 persona me aftësi të kufizuara, prej të cilëve 120 gra e vajza, ndarjen e 70 bursave universitare, punësimin e 422 asistentëve për fëmijë me nevoja të veçanta në shkollat e Kosovës, si dhe rritjen e pensioneve për këtë kategori.
Drejt artistëve pjesëmarrës, Kurti shprehu mirënjohje të thellë: “Me talentin, energjinë dhe guximin tuaj, na kujtoni se çfarë është e rëndësishme në këtë vend: njerëzit dhe dinjiteti, bashkëjetesa dhe ëndrrat”
Ai përmbylli fjalën me thirrjen që askush të mos mbetet pas, duke theksuar se çdo qytetar ka vend, rol dhe vlerë në shoqëri./teve1.info/
