Kryeministri në detyrë i Kosovës, Albin Kurti ka komentuar vendimin e Speciales për shtyrjen e afatit për shpalljen e aktgjykimit deri më 20 korrik.
Kurti ka thënë se Kosova ka nevojë për gjykata normale e jo për gjykata speciale.
“Sa i përket vendimit të Speciales që të shtyhet për dy muaj nëse s’gaboj vendimi i tyre ne e morëm vesh sikurse gjithë ju për shkak se Qeveria nuk ka qasje ne dinamikat dhe zhvillimet që bëhen në Speciale e cila nuk karakterizohet nga transparenca për vendin tonë. Kosova ka nevojë për gjykata normale e jo për gjykata speciale”, ka deklaruar Kurti.
Kurti ka theksuar se lufta e UÇK-së ishte dhe gjithmonë do të kujtohet dhe mësohet në histori si luftë e drejtë e cila ishte kundër një okupatori, armiku që kishte projekt gjenocidal kundër popullit tonë.
Ai ka kritikuar zvarritjen e proceseve gjyqësore nga Specialja.
“Në vend se të kemi gjykata normale kemi një gjykatë speciale e cila i vonon vendimet”, ka deklaruar Kurti./RTK
