Kryeministri i Kosovës, Albin Kurti, është takuar të mërkurën me homologun e tij maqedonas, Hristijan Mickoski, në New York, gjatë Javës së Nivelit të Lartë të Sesionit të 81-të të Asamblesë së Përgjithshme të Kombeve të Bashkuara.
Përmes një postimi në Facebook, Kurti ka bërë të ditur se gjatë takimit kanë diskutuar për bashkëpunimin në fushën e infrastrukturës dhe energjisë, me fokus në avancimin e projekteve të përbashkëta.
“Katër javë më parë ishim bashkë në nisjen e punimeve për ndërtimin e autostradës Shkup-Bllacë, ndërsa sot me kryeministrin e Republikës së Maqedonisë së Veriut, Hristijan Mickoski, u takuam në New York në Javën e Nivelit të Lartë të Sesionit të 81-të të Asamblesë së Përgjithshme të Kombeve të Bashkuara”, ka shkruar Kurti.
Ai ka thënë se gjatë takimit kanë vazhduar diskutimet për bashkëpunimin në infrastrukturë dhe energji, duke theksuar rëndësinë e përshpejtimit të procedurave për realizimin e tunelit Prizren-Tetovë.
“Vazhduam bisedën për bashkëpunimin në infrastrukturë e në energji, përkatësisht për avancimin e projekteve të përbashkëta. Theksova rëndësinë e përshpejtimit të procedurave për tunelin Prizren-Tetovë, si projekt me rëndësi të veçantë për qytetarët, sikurse edhe për zhvillimin e turizmit dhe ekonomitë e të dyja vendeve”, ka deklaruar Kurti.
Sipas tij, gjatë takimit është diskutuar edhe për zbatimin e marrëveshjes për thëngjillin.
“U pajtuam të vazhdojmë punën për realizimin e këtyre projekteve, të cilat kontribuojnë në ndërlidhjen rajonale dhe sigurinë energjetike”, ka shkruar Kurti.
Në fund, kryeministri Kurti ka theksuar raportet ndërmjet dy vendeve.
“Kosova dhe Maqedonia e Veriut, përveçse fqinje, janë shtete mike dhe partnere, me interesa të përbashkëta për paqe, siguri, zhvillim dhe integrim euroatlantik”, ka përfunduar ai./teve1.info/
