Kryeministri i Kosovës, Albin Kurti, pas prezantimit të master planit fitues për Kompleksin Memorial “Adem Jashari”, ka thënë se me këtë projekt synojnë t’i japin pamjen dhe trajtën e një peizazhi historik kompleks, në të cilin vizitat do të jenë udhëtime në tërë historinë e familjes Jashari të Prekazit.
Kurti ka thënë se nuk do të kursejnë asgjë që përmes këtij projekti ta paraqesin dinjitetshëm luftën e popullit për liri e drejtësi e pavarësi.
“Nuk do të kursejmë asgjë për të ndërtuar një kompleks memorial të rëndësishëm ndërkombëtarisht, i cili do të pasqyrojë dinjitetshëm dhe me një nivel të lartë artistik, qëndresën dhe luftën e popullit për liri e drejtësi, pavarësi dhe bashkim, ashtu siç e meriton figura e Adem Jasharit dhe e familjes Jashari”, ka shkruar Kurti në Facebook.
