Kurti fillimisht përmendi takimin e 18 gushtit në Bruksel i cili ishte në kuadër të bisedimeve, teksa theksoi se në fund të procesit nuk është më njohja e pavarësisë së Kosovës, mirëpo sipas tij, ajo përsëri është në qendër të marrëveshjes.
“Me datën 18 gusht, në kuadër të procesit të bisedimeve në Bruksel, ka qenë një takim fort i veçantë. Për shkak se për herë të parë ka agjendë të strukturuar. Përgjithësisht janë 33 marrëveshje në Bruksel, është e padrejtë ndaj procesit të bisedimeve dhe ndaj shtetit të Kosovës, që një marrëveshje të tërhiqet nga 33 marrëveshje si kryesorja. Nuk ekziston asnjë dokument që thotë se në Bruksel ka një marrëveshje më të rëndësishme se tjetra. Së shpejti bëhen dy vjet që ka zhvendosje tektonike të qasjes në dialog. Nuk është më njohja e pavarësisë së Kosovës e nënkuptuar në fund të procesit, por është e thënë qartazi se ajo ndodhet në qendër të marrëveshjes”, u përgjigj Kurti ndaj pyetjes së Hotit.
Ndërkaq, sa i përket asociacionit të komunave me shumicë serbe, Kurti vlerësoi se do ishte e gabuar në qoftë se kjo temë do konsiderohej më e rëndësishme se 33 marrëveshjet tjera në Bruksel, raporton teve1.info.
“Asociacioni i komunave me shumicë serbe është e vërtetë që është nënshkruar nga paraardhësi im më 19 prill të vitit 2013 në Bruksel. Pastaj një version shumë më konkret i këtij asociacioni që përshkruhet në këto gjashtë pikat e para të marrëveshjes së parë, përsëri e nënshkruar në Bruksel nga një tjetër paraardhës i imi. Prandaj, në këtë konstruksion të ri të procesit të bisedimeve, do ishte shumë gabim që ta nxjerrim nga 33 marrëveshjet, asociacionin e komunave serbe si të veçantë”, tha Kurti më tej.
Gjithashtu, Kurti përmendi edhe iniciativën e re të Bashkimit Evropian të mbështetur nga Franca, Gjermania dhe Shtetet e Bashkuara të Amerikës, teksa tha se edhe në këtë propozim do bëhet trajtimi i marrëveshjeve të mëhershme./teve1.info/.
