“Duhet të jemi të kujdesshëm dhe të drejtë”. Kështu ka deklaruar kryeministri i vendit, Albin Kurti duke iu përgjigjur emisarit amerikan për Ballkanin Perëndimor, Gabriel Escobar, për kërkesën e përsëritur të tij për formimin e Asociacionit të komunave me shumicë serbe.
Në një intervistë për mediumin turk “TRT”, Kurti ka thënë se kjo çështje mund të diskutohet pas njohjes reciproke me Serbinë.
“Qartë, Escobari është shumë aktiv dhe i përfshirë dhe e mirëpres këtë. E kam takuar disa herë. Duhet të jemi të kujdesshëm dhe të drejtë. Ajo që po i theksoj unë si kushte për çfarëdo lloj asociacioni s’janë qëndrime arbitrare të mijat apo mendime personale. Vullneti dhe dëshira e popullit të Kosovës, kushtetutshmëria dhe ligjshmëria, janë ato që më bëjnë të themi se së pari na duhet njohja reciproke dhe tek pastaj ndonjë lloj Asociacioni”, ka theksuar Kurti.
Ai po ashtu ka thënë se Serbia dëshiron të ketë një tjetër Republika Serbe, sikur ajo në Bosnjë.
Ndër të tjerash, kreu i Ekzekutivit ka potencuar se nuk e konsideron planin franko-gjerman si propozim për Asociacionin.
“Vetëm fjalia e fundit e nenit të fundit, u referohet të gjitha marrëveshjeve të së kaluarës, dhe janë 33 sosh dhe jo vetëm një, që nuk ka kaluar testin e Gjykatës Kushtetuese”, ka deklaruar Kurti.
“Ta kërkosh Asociacionin pa njohjen e Kosovës, është sikur të kërkosh kafe pa filxhan. Nuk jam në gjendje të sjell kafe pa filxhan. Shteti është filxhani”, ka përsëritur ai.
Para disa ditësh, Escobar në një intervistë për “The Pavlovic Today” ka thënë se Asociacioni “në një pikë” duhet dhe do të bëhet, dhe se ajo nuk është marrëveshje ndërmjet Kurtit dhe Serbisë, por ndërmjet Kosovës dhe Serbisë.
