Në Kuvend, partia e tij i ka fituar 53 ulëse.
E ky përfaqësim, kryeministrit në detyrë, Albin Kurti ia mundëson formimin e Qeverisë por jo edhe zgjedhjen e presidentit.
Andaj të premten, gazetarët e pyetën për një koalcion të mundshëm me Lidhjen Demokratike të Kosovës.
Por i pari i Qeverisë në detyrë, nuk dha komente për këtë cështje.
Më shumë për një marrëveshje në mes partive ka folur ministrja në detyrë e drejtësisë, Donika Gërvalla.
“Se cilët do të jenë hapat që do të ndjekim, atë do të ulemi së pari brenda koalicionit t’i diskutojmë dhe pastaj do të ulemi të diskutojmë edhe me partitë opozitare edhe do të jemi përsëri të përkushtuar dhe të angazhuar që të gjejmë mënyra për ta çarë bllokadën e krijuar”, tha Gërvalla.
Gërvalla vlerëson se qytetarët tashmë e kanë bërë të qartë qëndrimin e tyre.
“Është koha me u ulë dhe të diskutohet seriozisht dhe të hiqet dorë nga mentaliteti bllokues. Qytetari e ka thënë fjalën e vet për herë të tretë, e ka thënë fjalën e vet qartë. Fituesi i këtyre zgjedhjeve po shihet, po presim rezultatet zyrtare, po presim certifikimin e tyre dhe po dua të besoj që ishte hera e fundit që shkojmë në zgjedhje të panevojshme dhe joracionale e jo të kuptueshme për qytetarët”, tha ajo.
Si parti e dytë nga zgjedhjet ka dalë Partia Demokratike e Kosovës.
Por këta të fundit, nuk shohin mundësi bashkëpunimi me Lëvizjen Vetëvendosje dhe kryetarin e saj, Albin Kurtin.
E të vështirë një koalicion mes partive politike, po e shesh edhe Eugen Cakolli nga Instituti Demokratik i Kosovës.
“Me këtë konfiguracion aktualisht, Lëvizja Vetëvendosje do të mund të formojë e vetme Qeverinë, vetëm me komunitetet pakicë jo serbe përjashto këtu zotëri Rashiq i cili pritet të jetë pjesë e ekzekutivit. Që nënkupton që diskutimet e marrëveshjeve eventuale politike. Për çështjen e presidentit mund të vështirësohet ndjeshëm duke e ditur që Lëvizja Vetëvendosje në kuptim të funksionimit të ekzekutivit nuk ka fare nevojë për koalicion me subjekte të tjera, por që një koalicion i tillë duhet për çështjen e presidentit e ku partitë opozitare besoj mund ta shohin të paleverdishme një marrëveshje të tillë nëse presidenti nuk do të jetë nga radhët e tyre, duke e ditur që çfarëdo matematike për të hyrë në Qeveri mund të jetë afatshkurtër pasi zoti Kurti dhe qeveria për shkak të numrave që janë e ka mundësinë që pastaj kurdo të largoj cilindo subjekt politik nga koalicioni qeverisës dhe ti mbijetoj ndonjë mocioni eventual”, tha Cakolli.
Mungesa e konsensusit për Presidentin, u bë shkak që Kosova shkoi në zgjedhjet e parakohshme të 7 qershorit, vetëm gjashtë muaj pas atyre të 28 dhjetorit të fundvitit të kaluar.
