Kryeministri i Kosovës, Albin Kurti, bashkë me kryetarin e Kuvendit, Glauk Konjufca, me deputetë dhe ministra ka bërë homazhe në Kompleksin Memorial në Mejë, në kujtim të 24-vjetorit të masakrës, ku janë vrarë 376 persona, duke përfshirë civilë e fëmijë.
Kurti ka thënë se edhe pas 24 viteve ende nuk kemi drejtësi, dhe nuk kemi rehabilitim për familjet e viktimave.
“Bashkë me kryetarin e Kuvendit dhe me deputetë e ministra erdhëm këtu që të ndajmë dhembjen, pikëllimin, por gjithashtu të shprehim edhe mirënjohjen tonë të thellë me nënat, motrat, baballarët me vëllezërit dhe me fëmijët, gjyshërit, gjyshet e atyre të cilët u vranë para 24 viteve në mënyrë mizore nga regjimi gjenocidial i Millosheviqit. 24 vite më vonë nuk kemi drejtësi, nuk kemi ende rehabilitim për familjet e viktimave dhe për mbarë popullin tonë”, tha kryeministri në një prononcim për media, raporton teve1.info.
Kurti ka thënë se shqiptarët kanë qenë bashkë në luftën çlirimtare, por u vranë nga forcat gjeoncidiale serbe.
“Në mesin e të vrarëve këtu në Mejë, janë edhe 11 nxënës dhe 20 arsimtarë, janë vrarë shqiptarët pa dallim moshe, gjinie, prejardhje e feje. Shqiptarët ishin bashkë në luftën çlirimtare, por ata u vranë bashkë prej forcave gjenocidale të Serbisë. Ne nuk e trajtojmë këtë si çështje historie, por si një çështje të jetës sonë të këputur. Meqenëse këta të ri e këto te reja, sot do t’i kishin familjet e tyre, sot do të vazhdonin jetën dhe do ta gëzonin lirinë, që i ka rrënjët në gjakun edhe në sakrificën e martirëve, dëshmorëve”, tha kryeministri.
Kurti ka bërë të ditur për inicimin e Qeverisë në Komisionin Ndërkombëtar për Personat e Zhdukur, që sipas tij janë hapa drejt zbardhjes së fatit të personave të pagjetur.
“Dje, në mbledhjen e Qeverisë e iniciuam aderimin në ICMP, që është Komisioni Ndërkombëtar për Personat e Zhdukur dhe në Kuvend të Republikës do të ratifikohet në mënyrë që në këtë organizatë të rëndësishme ndërkombëtare ne të bëjmë hapa drejt zbardhjes së fatit të personave të pagjetur, të atyre që u zhduken me dhunë, që u rrëmbyen me forcë duke kërkuar edhe të vërtetën edhe përgjegjësinë, pra drejtësinë”, tha ai.
Mes tjerash, kryeministri potencoi se si qeveri kanë themeluar drejtori të veçantë në kuadër të Policisë së Kosovës, ku do të adresohen e të zbulohen krimet e kryera gjatë luftës së fundit në Kosovë.
“Në vitet e kaluara në Policinë e Kosovës për hetimet për krimet e kryera gjatë luftës kanë qenë vetëm një sektor në kaudër të Drejtorisë së Krimeve të Rënda, ndërkaq tash e kemi bërë drejtori të veçantë në kuadër të Policisë së Kosovës në atë që duhet të adresojë, të hulumtojë, të hetojë, të zbulojë krimet e kryera gjatë luftës dhe të mundësojë kapjen e kriminelëve duke e rritur numrin e zyrtarëve nga 19 në 41, pra është më shumë sesa dyfishim”. /teve1.info.
