Kryeministri i Kosovës, Albin Kurti, së bashku me ministrin për Komunitete dhe Kthim, Nenad Rashiq dhe zëvendësministrin e Industrisë, Ndërmarrësisë dhe Tregtisë, Enes Goran, janë takuar me pjesëtarë të komunitetit jo shumicë goran.
Në këtë takim pjesëmarrja përfshinte shoqërinë civile, punonjësit në institucione dhe përfaqësimin politik nga niveli lokal, ku kryeministri Kurti përmendi punën e qeverisë me Komisionin për Verifikimin e Diplomave të lëshuara nga Universiteti i Mitrovicës së Veriut.
“Në takim, Kryeministri Kurti i përditësoi me veprimet e qeverisë për komunitetin goran nga takimi i fundit që kishin në tetor. Këtu përfshihet pakoja mbështetëse prej 3 milionë euro për komunitetet jo shumicë, për OJQ-të, bizneset e reja dhe ekzistuese, dhe për fermerët dhe prodhuesit e vegjël në zonat rurale. U fol edhe për programin e Zyrës për Çështje të Komuniteteve, për ndarjen e 500 mijë eurove për OJQ-të dhe mediat, me mjete të rezervuara për secilin komunitet; dhe për përfituesit goran nga thirrja e fundit e Ministrisë për Komunitete dhe Kthim për ndërtimin e shtëpive”, thuhet në njoftimin e Zyrës së Kryeministrit.
Gjithashtu, është bërë e ditur se të pranishmit kanë ndarë brengat e tyre për sa i përket punësimit të komunitetit në institucione, ndërsa thuhet mes tjerash se kryeministri ka ndarë me ta planet për adresimin dhe trajtimin e kësaj çështje. /teve1.info/
