Kryeministri në detyrë i Republikës së Kosovës, Albin Kurti, ka deklaruar se aleanca dhe partneriteti me Shtetet e Bashkuara të Amerikës janë të veçanta dhe të palëkundura.
Kurti, i ka bërë këto deklarata gjatë një takimi me delegacionin e “Atlantic Council 2026 Balkans Forward Fellows”.
Sipas njoftimit të Zyrës së Kryeministrit, gjatë takimit është diskutuar për thellimin e partneritetit në fushën e ekonomisë, sigurisë dhe mbrojtjes, si dhe për forcimin e bashkëpunimit në këto fusha.
“Gjatë mandatit të kaluar, kemi investuar afër gjysmë miliard euro vetëm në sisteme të armatimit, duke arritur një nivel të paprecedentë të partneritetit në fushën e mbrojtjes”, ka deklaruar Kurti.
Ai ka bërë të ditur se pjesa kryesore e prokurimeve është realizuar përmes programeve amerikane Foreign Military Sales (FMS) dhe Direct Commercial Sales (DCS).
Në takim është diskutuar edhe për vendimin e Qeverisë dhe Kuvendit për dislokimin e një kontingjenti të Forcës së Sigurisë së Kosovës si pjesë e forcës ndërkombëtare të stabilizimit në Gaza.
Kurti ka ngritur gjithashtu çështjen e zbulimit të varrezave masive në Zubin Potok.
Ai ka përsëritur thirrjen ndaj partnerëve ndërkombëtarë për të ushtruar presion më të madh ndaj Serbisë, me qëllim të deklasifikimit të dosjeve ushtarake të arkivuara dhe ofrimit të informacioneve lidhur me vendndodhjen e këtyre varrezave./teve1.info/
