Nënkryetarja e PDK-së, Vlora Çitaku, ka reaguar pas Marshit për Liri, i cili u zhvillua sot në kryeqytet, duke thënë se Prishtina kurrë nuk është dukur më e bukur.
Çitaku, ka deklaruar edhe se, Prishtina foli edhe për ata që nuk janë më, për të rënët, për dëshmorët, për familjet që dhanë më të dashurit e tyre, për një gjeneratë që rrezikoi gjithçka që ne sot të mund të jetojmë të lirë.
“Kurrë më e bukur nuk është dukur Prishtina. Të rinj e të moshuar. Gra e burra. Nëna e baballarë. Fëmijë që luftën e njohin vetëm nga rrëfimet e prindërve të tyre dhe njerëz që ende i bartin plagët e saj. Një popull i ngritur në këmbë. Si një. Me një zë. Me një histori. Me një porosi. Me një thirrje: LIRI! Hashim Thaçi, Kadri Veseli, Jakup Krasniqi e Rexhep Selimi sot morën verdiktin e popullit të tyre. Të pafajshëm! Sepse ne kërkojmë drejtësi. Sepse nuk pranojmë që lufta jonë për liri të rishkruhet. Nuk pranojmë që historia e një populli që luftoi për të qenë i lirë të njolloset. Sot Prishtina foli edhe për ata që nuk janë më. Për të rënët. Për dëshmorët. Për familjet që dhanë më të dashurit e tyre. Për një gjeneratë që rrezikoi gjithçka që ne sot të mund të jetojmë të lirë. Ishte diçka jashtëzakonisht e fuqishme ta shihje Kosovën sot. Një popull i tërë, bashkë, përballë historisë së vet. Sepse ka momente kur një popull duhet ta kujtojë kush është, nga ka ardhur dhe sa shumë ka kushtuar liria e tij. Sot ishte një prej atyre momenteve. Kosova kujtoi se lirinë nuk e morëm dhuratë. Për të u luftua. Për të u sakrifikua. Për të u dhanë jetë. Hashim, Kadri, Jakup, Rexhep,sot Kosova ishte në këmbë për ju. Sot e morët verdiktin e popullit tuaj: Të pafajshëm! Tash ju presim aty ku e keni vendin. Në Kosovën e lirë, për të cilën luftuat. Ju presim në shtëpi, çlirimtarë! LIRI!”, shkruan Vlora Çitaku.
