Profesori universitar, Hajredin Kuçi, thotë se ish-krerët e Ushtrisë Çlirimtare të Kosovës (UÇK), të cilët po gjykohen në Hagë për krime lufte do të dalin faqebardhë.
Kuçi, thotë se në Hagë po zhvillohet një proces i padrejtësisë për drejtësinë.
“Unë e kam njërën prej detyrave ma më emocion që e bëj në jetë, në kuptimin profesional dhe njerëzor. Unë jam i bindur që do të dalin faqebardhë dhe kur them faqebardhë është kur do të vijë me ata në aeroport, unë i besoj kësaj. Atje po zhvillohet një proces i padrejtësisë për drejtësinë dhe krerët tonë, zoti Thaçi, Veseli, Krasniqi, Selimi, por edhe më herë Gucati, Haradinaj, Mustafa edhe Shala janë në anën e drejtësisë”, tha ish-ministri i Drejtësisë në emisionin “Respublika” në Tëvë1.
Ish-zëvendëskryeministri i Kosovës thotë se drejtësia u garanton ish-krerëve lirim.
“Procesi do t’i garantojë që drejtësia unë në anën e tyre dhe ashtu çfare janë do të kthehen në vendin tonë. Drejtësia iu garanton atyre lirim, është një proces i stërzgjatur, është një proces që nuk ka të bëjë asgjë me ata persona personalisht dhe nuk ka të bëjë asgjë me ata që mund të ndihen keq. Natyrisht, duhet ta mbështesim me argumente, mbrojtje për aktivitetin që bënë, angazhimin që e bënë”, deklaroi Kuçi.
Tutje, profesori universitar beson që do të vërtetohet se lufta e Kosovës ka qenë e drejtë dhe është zhvilluar në mënyrë të drejtë.
“Ata kanë një moral të fortë, një besueshmëri dhe po e shohim që pjesë e angazhimit të tyre për këtë ndërtimin e besimit Kosova është në anën e drejtësisë që lufta e Kosovës ka qenë e drejtë dhe është zhvilluar në mënyrë të drejtë. Unë besoj që kjo do të vërtetohet dhe do të përmbyllet ky kapitull i stigmatizimit të luftës dhe ky kapitull i asaj hijes. Ky është rezultat që Kosova nuk e ka përfunduar në tërësi çështjen e shtetit”, shtoi Kuçi.
Të katër ish-eprorët e UÇK-së akuzohen për krime lufte dhe krime kundër njerëzimit dhe gjenden në qendrën e paraburgimit në Hagë, që nga nëntori i vitit 2020. Që të gjithë, në nisje të gjykimit sërish u deklaruan të pafajshëm për të dhjetë pikat e aktakuzës. Aktakuza e Prokurorit të Specializuar në Hagë përmban gjithsejtë dhjetë akuza. Sipas aktakuzës, krimet e paraqitura aty janë kryer në periudhën prej marsit të vitit 1998 deri në shtator të vitit 1999, në Kosovë dhe në veri të Shqipërisë./teve1.info/
