Kryeministri kanadez Mark Carney e kritikoi ashpër Presidentin e SHBA-së Donald Trump të enjten, duke këmbëngulur se propozimi i tij për të thelluar lidhjet me Bashkimin Evropian nuk kishte për qëllim krijimin e një blloku të ri gjeopolitik “me sjellje më të mira”.
Komentet e Carney vijnë një ditë pasi Presidentja e Komisionit Evropian, Ursula von der Leyen, propozoi që Kanadaja të bëhej “anëtarja e parë e asociuar” e bllokut – një përcaktim që nuk ekziston, por që megjithatë provokoi një kërcënim të ri tarifor nga Trump.
Carney tha se një partneritet më i thellë me Evropën kishte për qëllim të krijonte “qëndrueshmëri” në vend të “vetë-mjaftueshmërisë”.
“Nuk po propozoj një bllok të tretë për t’u bërë një rival i fuqisë së madhe, por vetëm me sjellje më të mira”, u tha Carney ligjvënësve të BE-së në Francë, shkruan CNN.
Më vonë ai u tha gazetarëve se ligjvënësit kanadezë do të debatonin dhe në fund do të votonin mbi “strukturën përfundimtare” të një aleance të re me BE-në, por theksoi se Kanadaja nuk ishte as në gjendje të bëhej anëtare e plotë e Bashkimit Evropian, dhe as nuk kërkonte të ishte një e tillë.
Trump tha të mërkurën se Shtetet e Bashkuara mund të vendosin “tarifa të rënda” ndaj Bashkimit Evropian nëse ai e konsideron çdo marrëveshje të re me Kanadanë si një “akt armiqësor”.
