Kryeministri i Spanjës, Pedro Sanchez ka bërë deklarata të forta lidhur me zhvillimet e fundit në Lindjen e Mesme, duke akuzuar homologun e tij izraelit, Benjamin Netanyahu, për përshkallëzim të qëllimshëm të situatës në rajon.
Duke folur para parlamentit spanjoll, Sanchez tha se Netanyahu “kërkon t’i shkaktojë Libanit të njëjtin nivel dëmi dhe shkatërrimi”, citon Al Jazeera.
Në të njëjtën kohë, kryeministri spanjoll kritikoi ashpër edhe rolin e Shteteve të Bashkuara dhe Izraelit në përballjen me Iranin, duke e cilësuar luftën mes tyre si “një katastrofë absolute”.
Sipas tij, ky konflikt është nxitur për të “ushqyer interesat e të dyshuarve të zakonshëm”, pa specifikuar drejtpërdrejt aktorët që kishte parasysh.
Sanchez theksoi se pasojat e këtyre veprimeve janë të shumëfishta: “Dhe e gjithë kjo për çfarë? Për të minuar ligjin ndërkombëtar, për të destabilizuar Lindjen e Mesme, për të rindezur konfliktet në Irak dhe Liban dhe për ta varrosur Gazën nën rrënojat e harresës dhe indiferencës.”/teve1.info/
