Kompania Rajonale e Ujësjellësit “Prishtina” ka njoftuar se vetëm gjatë së dielës janë identifikuar katër lidhje ilegale në rrjetin e ujësjellësit në Hajvali, brenda vetëm pak orësh.
Sipas kompanisë, aksioni për identifikimin e kyçjeve të paligjshme po vazhdon, ndërsa zonat e Hajvalisë dhe Veternikut vazhdojnë të kryesojnë për numrin e rasteve të evidentuara.
KRU “Prishtina” ka bërë të ditur se gjatë vitit 2025 janë zbuluar dhjetëra lidhje ilegale, ndërsa i njëjti fenomen po vazhdon edhe gjatë vitit 2026.
“Deri më tash Hajvalia e Veterniku po prijnë me lidhje ilegale. Sot veç në Hajvali 4 lidhje ilegale brenda pak orëve. Vazhdon aksioni për identifikimin e kyçjeve ilegale në rrjetin e ujësjellësit. Në vitin 2025 u identifikuan dhjetëra lidhje ilegale, ndërsa edhe gjatë vitit 2026 po vazhdon i njëjti trend”, thuhet në njoftim.
Kompania ka rikujtuar se kyçjet ilegale dëmtojnë rrjetin e ujësjellësit dhe ndikojnë drejtpërdrejt në furnizimin e rregullt me ujë për të gjithë konsumatorët.
“Shtrohet pyetja: ku është vetëdijesimi se çdo kyçje ilegale dëmton rrjetin dhe rëndon furnizimin me ujë për të gjithë konsumatorët?”, theksohet në fund të njoftimit./teve1.info/
