Pas një periudhe të gjatë, partia fituese e zgjedhjeve, Lëvizja Vetëvendosje, vendosi ta ndryshojë kandidaten për kryetare të Kuvendit.
Por edhe ministrja në detyrë e Punëve të Jashtme, Donika Gërvalla, nuk arriti të sigurojë përkrahjen e nevojshme për këtë post.
Përveç kundërshtimeve nga partitë opozitare, votë për Gërvallën nuk pati as deputetja e Vetëvendosjes, Shqipe Mehmeti Selimi.
Andaj profesori në Universitetin e Agderit, Abit Hoxha, thotë se është legjitime që partitë opozitare të kërkojnë një kandidat më gjithëpërfshirës për pozitën e kryeparlamentarit.
“Mendoj se kërkesa e partive opozitare është legjitime për të pasur një emër tjetër për kryeparlamentar, që siguron mbarëvajtjen e punës së Kuvendit të Kosovës. Kosova është një republikë parlamentare, prandaj Kuvendi iu takon të gjitha partive politike, pavarësisht përqindjes së tyre në zgjedhje”, ka thënë Hoxha.
Ndërsa analisti politik, Artan Muhaxhiri, paralajmëron se nëse propozohen kandidatë që nuk i sigurojnë 61 vota, bllokada politike do të vazhdojë.
“Nëse propozohen kandidatë që nuk i kanë 61 vota, sërish do të vazhdojë kjo agoni – një bllokadë e re, e cila mund të zgjidhet vetëm përmes një aktgjykimi të ri të Gjykatës Kushtetuese”, ka thënë Muhaxheri.
Muhaxhiri i konsideron edhe partitë opozitare bashkëpërgjegjëse për situatën e krijuar në Kuvend.
“Edhe partitë opozitare janë bashkëfajtore për këtë bllokadë, sepse në asnjë moment nuk kanë treguar vullnet për bashkëpunim. Ato janë barrikaduar në pozicionet e tyre, duke i shkaktuar dëm si vetes, ashtu edhe Lëvizjes Vetëvendosje”, është shprehur tutje Muhaxheri.
Në aktgjykimin e fundit, Gjykata Kushtetuese përcaktoi se deputetët janë të detyruar të marrin pjesë në seancën konstituive dhe se një kandidat nuk mund të propozohet më shumë se tri herë nga partia fituese.
