Presidenca njoftoi se në këtë ceremoni do të marrin pjesë presidentja, Vjosa Osmani, kryetari i Kuvendit, Glauk Konjufca dhe kryeministri, Albin Kurti.
“Nesër (14.12.2022), në orën 11:00 do të mbahet ceremonia e nënshkrimit të aplikimit për anëtarësim në Bashkimin Evropian nga Presidentja Vjosa Osmani, Kryetari i Kuvendit, Glauk Konjufca dhe Kryeministri, Albin Kurti”, thuhet në njoftim.
Edhe kryeministri i vendit, Albin Kurti njoftoi të martën se Kosova do ta dorëzojë këtë javë aplikimin për anëtarësim në BE.
Kurti dje në mbledhjen e Qeverisë tha se Kosova është vendi i fundit në Ballkanin Perëndimor që aplikon për anëtarësim në BE, ani pse sipas tij, është e para sa i përket demokracisë e sundimit të ligjit. /Teve1.info/
