Kryetari i Partisë Demokratike të Kosovës, Memli Krasniqi, ka kujtuar sot pesëvjetorin e ndalimit të ish-udhëheqësve të Ushtrisë Çlirimtare të Kosovës – Hashim Thaçi, Kadri Veseli, Jakup Krasniqi dhe Rexhep Selimi – duke e cilësuar këtë periudhë si pesë vite padrejtësie e zvarritjeje të procesit gjyqësor në Hagë.
Krasniqi ka theksuar se katër ish-krerët e UÇK-së u përballën me akuzat me dinjitet dhe besim në drejtësi, ashtu siç i ka hije burrështetasve dhe ushtarëve të lirisë.
“Sot bëhen pesë vjet që kur padrejtësisht u ndaluan katër nga udhëheqësit e luftës çlirimtare. Pesë vjet më vonë, procesi po vazhdon të zvarritet, padrejtësia të rritet, ndërsa e vërteta që ne e dimë ende nuk ka marrë verdiktin që e meriton”, ka shkruar ai në një postim në Facebook.
Krasniqi ka shtuar se historia e Kosovës nuk mund të rishkruhet nga asnjë gjykatë, sepse ajo është shkruar me gjakun, sakrificën dhe qëndresën e popullit të saj.
“Për 1,826 ditë, ata dhe familjet e tyre kanë përballuar vuajtjen me qetësi e me besim, për hir të së vërtetës dhe drejtësisë. Sot, pesë vjet më vonë, me mirënjohje, mall e krenari, Kosova kërkon drejtësi, të vërtetën dhe liri për çlirimtarët”, ka përfunduar Krasniqi.
