Komisioni Qendror i Zgjedhjeve ka bërë të ditur se po vazhdon procesi i aplikimit për akreditimin e vëzhguesve dhe mediave për zgjedhjet e parakohshme për Kuvendin e Kosovës, të planifikuara të mbahen më 7 qershor.
Sipas njoftimit, afati për aplikim, i cili ka nisur më 5 maj, do të zgjasë deri më 30 maj 2026.
KQZ-ja thekson se gjatë kësaj periudhe 26-ditore, subjektet politike të certifikuara, organizatat joqeveritare, organizatat qeveritare dhe ndërqeveritare, organizatat ndërkombëtare që merren me zgjedhjet dhe të drejtat e njeriut, mediat, si dhe përfaqësuesit e shteteve të huaja, kanë mundësi të aplikojnë online për akreditimin e vëzhguesve të tyre.
Si realizohet aplikimi?
Hapi i parë: Përfaqësuesi i autorizuar (i organizatës joqeveritare, organizatës qeveritare/ndërqveritare, organizatës ndërkombëtare të specializuar në zgjedhje dhe të drejtat e njeriut; mediave; dhe përfaqësuesi i vendeve të huaja) duhet të plotësojë online të dhënat që kërkohen në platformën: apliko.kqz-ks.org
Hapi i dytë: Pas aplikimit, Zyra për Regjistrim, Certifikim dhe Kontrollin Financiar të Subjekteve Politike (ZRCKFSP) do të shqyrtojë dhe do të miratojë ose jo aplikimin fillestar. Pas vërtetimit të aplikimit, ZRCKFSP, do t’i përcjellë përmes e-mailit përfaqësuesit të autorizuar kredencialet për t’u qasur në platformën online në mënyrën që të bashkangjesë edhe të dhënat për personat e organizatës / medias që kërkon të akreditohen.
