Komisioni Qendror i Zgjedhjeve do të mbajë sot mbledhjen e radhës në Prishtinë, ku në fokus do të jenë përgatitjet për zgjedhjet e parakohshme për Kuvendin e Kosovës.
Mbledhja pritet të nisë në orën 18:00 dhe do të udhëhiqet nga kryesuesi i KQZ-së, Kreshnik Radoniqi.
Lajmin e ka konfirmuar zëdhënësi i KQZ-së, Valmir Elezi, i cili njoftoi se gjatë takimit do të trajtohen çështje që kanë të bëjnë me organizimin e procesit zgjedhor.
Sipas rendit të ditës, fillimisht do të shqyrtohen aktivitetet e Zyrës së KQZ-së, përfshirë rekomandimin për certifikimin e subjekteve politike që do të marrin pjesë në zgjedhjet e parakohshme të planifikuara për 7 qershor 2026.
Në kuadër të aktiviteteve të Sekretariatit të KQZ-së do të diskutohet edhe rekomandimi për numrin e votuesve në Qendrën e Votimit në përfaqësinë diplomatike në Frankfurt.
Në përfundim të mbledhjes është paraparë edhe pika “Të ndryshme”, ku mund të trajtohen tema të tjera që lidhen me procesin zgjedhor në vend.
Kjo mbledhje vlerësohet si pjesë e përgatitjeve të institucioneve zgjedhore për organizimin dhe administrimin e zgjedhjeve të parakohshme në Kosovë./teve1.info/
