Komisioni Qendror i Zgjedhjeve (KQZ) do të nisë sot procesin e rinumërimit të fletëvotimeve në 185 vendvotime të rregullta nga gjithsej 2,498 sa kanë qenë në zgjedhjet e parakohshme parlamentare të 7 qershorit.
Lajmi është konfirmuar nga zëdhënësi i KQZ-së, Valmir Elezi, i cili bëri të ditur se vendimi për rinumërim është marrë si masë shtesë kontrolli për të garantuar saktësinë e procesit zgjedhor.
Sipas tij, 185 vendvotimet që do t’i nënshtrohen rinumërimit përbëjnë 7.41 për qind të numrit të përgjithshëm të vendvotimeve ku është zhvilluar procesi i votimit.
“Komisioni Qendror i Zgjedhjeve ka vendosur që të rinumërojë fletëvotimet e 185 vendvotimeve të rregullta, të cilat më herët janë numëruar në Qendrat Komunale të Numërimit. Rinumërimi do të fillojë të enjten, më 18 qershor”, ka deklaruar Elezi.
Ai ka sqaruar se vendimi është marrë pas problemeve të evidentuara në disa Qendra Komunale të Numërimit gjatë procesit të numërimit të votave për kandidatët për deputetë në zgjedhjet e kaluara, me qëllim që të sigurohet se rezultatet janë përpunuar në mënyrë të saktë dhe transparente.
Ndërkohë, sipas rezultateve të deritanishme të publikuara në platformën e KQZ-së, Lëvizja Vetëvendosje prin me 47.13 për qind të votave. Pas saj renditen Partia Demokratike e Kosovës (PDK) me 19.44 për qind, Lidhja Demokratike e Kosovës (LDK) me 16.69 për qind dhe Aleanca për Ardhmërinë e Kosovës (AAK) me 6.74 për qind.
