Komisioni Qendror i Zgjedhjeve (KQZ) ka njoftuar se po vazhdon procesi i shtypjes së fletëvotimeve për zgjedhjet e parakohshme për Kuvendin e Republikës së Kosovës.
Sipas njoftimit, shtypja e fletëvotimeve po realizohet në shtypshkronjën e dokumenteve me siguri të lartë “Cetis” në Celje të Sllovenisë.
Fletëvotimet përmbajnë elemente të avancuara të sigurisë, të cilat garantojnë autenticitetin dhe mbrojtjen e tyre nga kopjimi apo falsifikimi, në përputhje me standardet e përcaktuara nga KQZ.
Procesi i shtypjes është mbikëqyrur nga ekipe të anëtarëve të KQZ-së, të cilët kanë përcjellë nga afër të gjitha fazat e tij.
“Fillimisht mbikëqyrjen e kanë bërë anëtarët Ilir Gashi, Sami Hamiti, Muharrem Nitaj dhe Violeta Salihu, ndërsa më pas procesin e ka vazhduar kryesuesi i KQZ-së, Kreshnik Radoniqi, së bashku me anëtarin Alban Krasniqi. Në fazat përmbyllëse pritet të përfshihen edhe anëtarët Stefan Filipović, Delvir Tairi dhe Shukrije Stolla, si dhe zyrtarë të Sekretariatit të KQZ-së”, theksohet në njoftim.
Sipas vendimit të KQZ-së, për zgjedhjet e parakohshme janë planifikuar gjithsej 1,778,300 fletëvotime.
Prej tyre, 1,605,000 janë për vendvotime të rregullta, 19,450 për votim me kusht, 13,500 rezervë, 3,500 për persona me nevoja të veçanta, 108,000 për votim me postë dhe 28,850 për votim në përfaqësi diplomatike./teve1.info/
